新帥伊拉奧拿領軍第一擊 紅軍省招牌誓破新特蘭_東方日報

利物浦美國季前集訓巡迴賽，首場熱身賽喺美職拿舒維爾球場出擊，對手係同屬英超嘅「黑貓」新特蘭。「紅軍」今季由伊拉奧拿執教，新帥戰術風格係高強度逼搶，球員應該駕輕就熟，雖然利物浦人腳未齊，但球隊向來重視熱身賽，近6仗熱身賽獲5勝1負，今場要贏新特蘭並非難事，利物浦可睇高一線。（周日早上6時開賽）文:邪神

利物浦上周開操，本周初拉隊去到美國芝加哥展開季前集訓，將會喺美國踢3場比賽，包括今場對新特蘭，跟住會對域斯咸同列斯聯。今次「紅軍」隨行球員多達31人，包括新到貴價中堅謝列美查基，中場則有蘇保斯拉爾孭飛，至於分別由羅馬同阿士東維拉外借回收嘅森美卡斯及哈維艾利洛亦已隨隊，前鋒線有費達歷高基艾沙，呢個陣容雖然唔係最強人腳，但應付熱身賽已經夠殺。

黑貓志在練兵冇戰意
新特蘭上季英超獲得第7名，取得歐霸盃資格，不過球隊今季未有重大收購，繼續以現有班底應戰；至於今場熱身賽方面，隊長格列沙加踢完世盃仍未歸隊，同利物浦一樣人腳未齊，而且今仗以練兵為主，勝負無關痛癢戰意一般，球員嘅戰意將會成為今仗最大分野。

利物浦係爭標球隊，上季雖然保住歐聯資格，但施洛照樣被炒，未教過大球會嘅伊拉奧拿剛上任，首仗出擊定必想贏波立威，至於「紅軍」眾將亦要喺新帥面前留個好印象，亦唔會揸流攤，所以今場利物浦值得睇好。